ਜਜ਼ਬਾਤ

ਆਵੇ ਸਮਝ ਨਾ ਰੱਬ ਜਾਣੇ ਇਹ ਕੋਈ ਬਿਮਾਰੀ ਏ
ਸਾਡੀ ਅੱਖ 'ਚੋਂ ਹੰਝੂ ਇੱਕ ਵੀ ਇਸ਼ਕ਼ ਲਈ ਕਿਰਿਆ ਨੀ,
ਬਦਨਸੀਬੀ ਏ ਜਾਂ ਰੱਬ ਦੀ ਕੋਈ ਮੇਹਰ ਹੋਈ
ਇਹ ਦਿਲ ਵੀ ਕਿਸੇ ਨੈਣਾਂ ਦੇ ਤੀਰ ਤੋਂ ਚਿਰਿਆ ਨੀ,
ਦਾਅ ਲੱਗਿਆ ਨੀ ਥੋੜੀ ਕੋਸ਼ਿਸ਼ ਵੀ ਕਰਕੇ ਦੇਖ ਲਈ
ਵਾਰ-ਵਾਰ ਕਰਾਂ ਹੁਣ ਐਨਾ ਜ਼ਮੀਰ ਤਾਂ ਗਿਰਿਆ ਨੀ,
ਇਹੀ ਆਸ ਲਾਈ ਕਿਤੇ ਦੂਰ ਦੁਰਾਡੇ ਬੈਠੀ ਹੋਊ
ਥੋੜਾ ਗੁੰਝਲਦਾਰ ਹਾਂ ਐਨੀ ਦੁਨੀਆ ਤਾਂ ਫਿਰਿਆ ਨੀ |

ਵਿਅੰਗ- ਪੈਸੇ ਦੇ ਭਰਮ

ਕਦੇ-ਕਦੇ ਮੈਨੂੰ ਆਪਣੀ ਕਿਸਮਤ ਉੱਤੇ ਤਰਸ ਜਿਹਾ ਆ ਜਾਂਦਾ
ਜਦ ਕੋਈ ਚਿੱਗਤੀ ਮੈਨੂੰ ਗਰੀਬ ਕਹਿ ਕੇ ਬੁਲਾ ਜਾਂਦਾ,
ਹੁਣ ਕਿਸਮਤ ਨੂੰ ਕੀ ਦੋਸ਼ ਦਈਏ ਜਿਹੜੀ ਲਕੀਰਾਂ 'ਚ ਗਈ ਗੁੰਦੀ
ਪਰ ਗਰੀਬ ਤਾਂ ਮੈ ਸੁਣਿਆ ਕਹਿੰਦੇ ਗਧੀ ਵੀ ਨੀ ਹੁੰਦੀ....
ਨਾਲੇ ਲੋਕ ਆਪ ਹੀ ਤਾਂ ਕਹਿੰਦੇ ਨੇ
"ਆਖੇ ਪੈਸਾ ਤਾਂ ਜੀ ਹੱਥਾਂ ਦੀ ਮੈਲ ਆ"
ਇਹ ਤਾਂ ਹੁਣ ਪੈਸਾ ਹੀ ਜਾਣਦਾ ਏਹਨੇ ਕੀਹਦੇ ਕੋਠੇ ਤੇ ਪਾਉਣੀ ਪੈਲ ਆ,
ਆਪਾਂ ਤਾਂ ਜੀ ਐਨੀ ਘਾਲਣਾ ਹੀ ਘਾਲ ਸਕਦੇ ਆ
ਬਸ ਘਰੇ ਬੋਤਲ ਵਿੱਚ ਮਨੀ-ਪਲਾਂਟ ਪਾਲ ਸਕਦੇ ਆ,
ਕੰਧ ਵਿਚ ਮੇਖ ਗੱਡ ਕੇ ਬੋਤਲ ਨੂੰ ਕਿਸੇ ਉੱਚੀ ਜਹੀ ਜਗਾ ਟੰਗ ਦਵੋ
ਜਦੋ ਵੇਲ ਵੱਡੀ ਹੋਜਵੇ, ਫੇਰ ਕਿਸੇ ਸੂਤ ਦੀ ਰੱਸੀ ਨਾਲ ਬੰਨ ਦਵੋ,
ਹੁਣ ਇਹ ਪੈਸੇ ਦੀ ਮਰਜ਼ੀ ਆ
ਕਿ ਓਹ ਆਵੇ ਜਾਂ ਨਾ ਆਵੇ
ਪਰ ਘਰ ਦੀ ਕੋਈ ਸਿਆਣੀ ਬੁੜ੍ਹੀ
ਏਹਨੂੰ ਪਾਣੀ ਜਰੂਰ ਦਿਖਾਵੇ |

ਪੈਸੇ ਨੂੰ ਖਿੱਚਣ ਦਾ ਇੱਕ ਤਰੀਕਾ ਮੈਂ ਹੋਰ ਵੀ ਸੁਣਿਆ ਵਾ
ਮਨੀ-ਪਲਾਂਟ ਦੇ ਨਾਲ ਨਾਲ ਮੈਂ ਓਹ ਵੀ ਚੁਣਿਆ ਵਾ,
ਕਹਿੰਦੇ ਸੱਪ ਦਾ ਤਿਓਹ ਤਾਂ ਦੁੱਧ ਤੋ ਵੱਧ ਪੈਸੇ 'ਚ ਰਹਿੰਦਾ
ਤਾਂ ਹੀ ਤਾ ਚੰਦਰਾ ਮਾਇਆ ਉੱਤੇ ਕੁੰਡਲ ਮਾਰ ਕੇ ਬਹਿਦਾ,
ਹੁਣ ਸੱਪ ਨੂੰ ਪੈਸਿਆਂ ਦੇ ਕੋਲ ਰੱਖਣ ਦਾ ਕੰਮ ਤਾਂ ਔਖਾ....
ਫੇਰ ਕਿਉਂ ਨਾ ਚੰਦਰੇ ਦੀ ਕੰਜ ਰੱਖ ਕੇ ਸਾਂਭੀਏ ਮੌਕਾ,
ਇਹਨਾ ਬਹਿਮਾ-ਭਰਮਾਂ ਦੀ ਵੀ ਕਿਹੜਾ ਕੋਈ ਹੱਦ ਹੁੰਦੀ ਆ
ਨਾਲੇ ਸੱਪ ਦਾ Best Subsitude ਤਾਂ ਓਹਦੀ ਕੰਜ ਹੀ ਹੁੰਦੀ ਆ,
ਹੁਣ ਮਨੀ-ਪਲਾਂਟ ਪਾਲਣ ਦੇ ਨਾਲ-ਨਾਲ ਕੰਮ ਇਹ ਵੀ Lucky ਆ
ਏਸੇ ਲਈ ਅੱਜ-ਕੱਲ 4 'ਕੁ ਪੈਸਿਆਂ 'ਚ ਮੈਂ ਸੱਪ ਦੀ ਕੰਜ ਵੀ ਰੱਖੀ ਆ |

ਬੇਬੇ ਕਹਿੰਦੀ ਹੁੰਦੀ ਸੀ
ਜੇ ਕਿਸੇ ਦੀ ਨਜ਼ਰ ਤੋਂ ਬਚਣਾ ਤਾਂ ਇੱਕ ਗੱਲ ਯਾਦ ਰੱਖਿਓ
ਕਿਸੇ ਨਵੀਂ ਖਰੀਦੀ ਚੀਜ਼ ਜਾਂ ਘਰ ਵਿੱਚ ਸ਼ੁਆਰੇ ਜਰੂਰ ਰੱਖਿਓ,
ਹੁਣ ਜਿਹੜੇ ਸ਼ੁਆਰੇ ਲੋਕਾਂ ਦੀਆਂ ਨਜ਼ਰਾਂ ਨੂੰ ਡੱਕਣਗੇ
ਫੇਰ ਤਾਂ ਓਹ ਪੈਸੇ ਵਾਲਾ ਦੁੱਖ ਵੀ ਜਰੂਰ ਚੱਕਣਗੇ,
ਪੈਸਾ ਵੀ ਓਥੇ ਹੀ ਆਉਦਾ ਜਿੱਥੇ ਮੋਰ ਪੈਲ ਪਾਉਦੇ ਨੇ
ਇਹਨਾ ਦੇ ਖੰਬ ਵੀ ਕਹਿੰਦੇ ਪੈਸੇ ਨੂੰ ਦੂਣਾ ਵਧਾਉਦੇ ਨੇ,
ਫੇਰ ਕੀ ਸੀ....
ਲਿਆ-ਲਿਆ ਖੰਬ ਸਾਰੇ ਕਮਰੇ ਖੰਬਾਂ ਨਾਲ ਭਰਤੇ
ਨਾਲੇ ਬੇਬੇ ਨੂੰ ਯਾਦ ਕਰਕੇ
5 'ਕੁ ਸ਼ੁਆਰੇ ਵੀ ਪੈਸਿਆਂ ਕੋਲ ਧਰਤੇ |

ਸੁਣਿਆ ਉੱਲੂ ਜਿੱਥੇ ਬੈਠਣ ਉਜੜਾ ਹੀ ਭਾਲਦੇ ਨੇ
ਪਰ ਇਹਨਾਂ ਚੰਦਰਿਆ ਦੇ ਨਹੁੰ ਕਹਿੰਦੇ ਬੜੇ ਕੰਮ ਸਵਾਰਦੇ ਨੇ,
ਇੱਕ ਗੱਲ ਹੋਰ ਕੰਨੀ ਪਈ ਸੀ
ਕਿ ਲੋਕੀ ਤਾਂ 786 ਨੂੰ ਵੀ ਸ਼ੁੱਭ ਨਿਗਾਹ ਨਾਲ ਤੱਕਦੇ ਨੇ
ਤਾਂ ਹੀ ਤਾ ਏਸ ਨੰਬਰ ਦਿਆਂ ਨੋਟਾਂ ਨੂੰ ਓਹ ਸਾਂਭ-ਸਾਂਭ ਰੱਖਦੇ ਨੇ,
ਹੁਣ ਮਰਦਾ ਕੀ ਨਾ ਕਰਦਾ....
ਨਾਲੇ ਤਾਂ ਉੱਲੂ ਦਾ ਨਹੁੰ ਲਿਆ ਕੇ ਅਲਮਾਰੀ 'ਚ ਜੜਤਾ
ਨਾਲੇ 786 ਨੰਬਰ ਵਾਲਾ ਨੋਟ ਕਿਤੋਂ ਲੱਭਕੇ
ਜੋੜੇ 4 'ਕੁ ਪੈਸਿਆਂ 'ਚ ਧਰਤਾ |

ਅੱਗੇ ਕਿ ਦੱਸੀਏ ??
ਇਹਨਾਂ ਪੰਗਿਆਂ 'ਚ ਫਿਰਦੇ-ਫਿਰਦੇ ਨੇ ਪੈਸਾ ਵੀ ਸਾਰਾ ਗਵਾ ਲਿਆ
ਕਿਸੇ ਘੋੜੇ ਜਾਂ ਖੱਚਰ ਦੀ ਖੁਰੀ ਲੱਭਦੇ-ਲੱਭਦੇ ਨੇ
ਆਪਣਾ ਸਾਈਕਲ ਵੀ ਪੈਂਚਰ ਕਰਵਾ ਲਿਆ,
ਜਦੋਂ ਪੈਂਚਰ ਵਾਲੇ ਭਾਈ ਕੋਲ ਤਰਲਾ ਪਾਇਆ
ਆਹ ਸਾਰਾ ਵਾਕਾ ਓਹਨੂੰ ਸੁਣਾਇਆ
ਫੇਰ ਹਾਰਕੇ ਓਸ ਬਜੁਰਗ ਨੇ ਮੈਨੂੰ ਸਮਝਾਇਆ....
ਕਿ ਪੁੱਤ, ਜੇ ਭੇਲੀ ਫੁੱਟਦੀ ਆ
ਤਾਂ ਹੀ ਆਉਦਾ ਗੁੜ੍ਹ ਭੋਰਾ-ਭੋਰਾ
ਕਮਲਿਆ ਕਿਸੇ ਕਾਮੇ ਬੰਦੇ ਨੂੰ ਵੀ
ਹੁੰਦਾ ਕਿਤੇ ਪੈਸਿਆਂ ਦਾ ਥੋੜ੍ਹਾ ??
ਜੇ ਕੰਮ ਨੂੰ ਹੱਡ ਹਲਾਏਗਾ
ਤਾਂ ਹੀ 4 ਪੈਸੇ ਪਾਏਗਾ,
ਜੇ ਐਸ਼ ਨਾ ਕਰ ਸਕਿਆ
ਤਾਂ ਘੱਟੋ-ਘੱਟ ਰੋਟੀ ਤਾਂ ਰੱਜਵੀ ਖਾਏਗਾ |

ਸਿੱਟਾ: ਖੱਜਲ-ਖੁਆਰੀ ਨੂੰ ਛੱਡਕੇ ਹੋਰ ਕੁੱਝ ਨਾ ਪਿਆ ਪੱਲੇ
ਘੁੱਮ-ਘੁਮਾ ਕੇ ਆ ਗਈ ਖੋਤੀ ਓਸੇ ਬੋਹੜ ਦੇ ਥੱਲੇ |

First Date

ਦੂਰੋਂ ਤਾਂ ਦਰਸ਼ਨ ਰੋਜ਼ ਹੁੰਦੇ
ਅੱਜ ਪਹਿਲੇ ਮੇਲ ਲਈ ਆਈ ਸੀ,
ਹੱਥਾਂ ਦੀਆਂ ਮੂਠੀਆਂ ਵੱਟ ਰੱਖੀਆਂ
ਗੱਲਾਂ ਤੇ ਲਾਲੀ ਛਾਈ ਸੀ,

ਪਹਿਰਾ ਸੀ ਸੰਗ ਦਾ ਅੰਗ ਉੱਤੇ
ਹਰ ਸਾਹ ਵਿੱਚ ਓਹਦੇ ਤੇਜੀ ਸੀ,
ਗੱਲ-ਗੱਲ ਤੇ ਕਾਰਨ ਰਹੀ ਪੁੱਛਦੀ
ਜਿਵੇਂ ਕਿਸੇ ਸਿਖਾ ਕੇ ਭੇਜੀ ਸੀ,

ਕੁੱਝ ਮੇਰਾ ਵੀ ਸੀ ਦਿਲ ਕੰਬਿਆ
ਜਦੋਂ ਓਸ ਨਾ ਨਜ਼ਰ ਮਿਲਾਈ,
ਮੇਰੇ ਮਿਲਣ ਦੀ ਜਿੱਦ ਦਾ ਓਹਦੇ ਮੁੱਖ ਉੱਤੇ
ਦਿੰਦਾ ਸੀ ਰੋਸ ਦਿਖਾਈ,

ਮੈਨੂੰ ਲੱਗਦਾ ਓਹ ਕਿਸੇ ਡਰ ਕਰਕੇ
ਅੱਜ ਪਹਿਲੀ ਵਾਰ ਸੀ Rude ਬੜੀ,
ਕਿਤੇ ਨੇੜੇ ਤੇੜੇ ਵੀ ਨਾ ਪਹੁੰਚੀ
ਮੁੱਦੇ ਦੀ ਗੱਲ ਤਾਂ ਦੂਰ ਖੜੀ,

ਹੁੰਦੇ ਬੈਠੇ ਜਿਵੇਂ ਕਿਸੇ ਸੋਗ ਉੱਤੇ
ਕੋਈ ਕਿਸੇ ਨਾ ਗੱਲ ਚਲਾਈ,
ਮੈਂ ਵੀ ਸੀ ਉਂਗਲਾ ਮਾਰ ਰਿਹਾ
ਆਪਣੇ Mobile ਤੇ Game ਲਗਾਈ,

ਫੇਰ ਹੌਲੀ ਜਹੇ ਉਸਨੇ ਹਾਲ ਪੁੱਛਿਆ
ਸੌਂ ਰੱਬ ਦੀ ਸਵਾਦ ਲਿਆਤਾ,
ਜਿਵੇਂ ਤੋੜ 'ਚ ਲੱਗੇ ਅਮਲੀ ਨੂੰ
ਕਿਸੇ 'ਫੀਮ ਦਾ ਪਹਾੜ ਦਿਖਾਤਾ,

ਦੇਖ ਕੇ ਮੈਨੂੰ Sad ਜਿਹਾ
ਓਹਨੇ ਆਪਣੀ ਆਕੜ ਲਾਹ ਛੱਡੀ,
ਆਈ ਹਾਂ ਤੇਰੇ ਕਰਕੇ ਵੇ
ਇੱਕ ਬਾਤ ਪਿਆਰ ਦੀ ਪਾ ਛੱਡੀ,

ਸਾਡੀ ਸੁਪਨਿਆ ਵਿੱਚ ਮੁਲਾਕਾਤ ਹੋਵੇ
ਡਰਦੇ ਨੇ ਮੈਂ ਵੀ ਦੱਸ ਦਿੱਤਾ,
ਜਿਵੇਂ ਪਹਿਲਾਂ ਹੀ ਓਹ ਜਾਣੂ ਸੀ
ਹਲਕਾ ਜਿਹਾ ਓਹਨੇ ਹੱਸ ਦਿੱਤਾ......

ਇੱਕ ਭੇਤ

ਜਿਹਦੀ ਜੋਟੀ ਫੜਕੇ ਤੁਰਿਆ ਸੀ
ਓਹ ਮੇਰਾ ਹੀ ਕੋਈ ਸਾਇਆ ਸੀ,
ਜੋ ਰਿਹਾ ਸੀ ਸਦੀਆ ਤੋਂ ਲੁਕਿਆ
ਓਹ ਗੀਤ ਓਹਦੇ ਨਾਲ ਗਾਇਆ ਸੀ,
ਜੋ ਚੀਸ ਬਣਿਆ, ਜੀਹਨੇ ਤੰਗ ਕਰਿਆ
ਓਹੀ ਦਰਦ ਮੈਂ ਓਹਨੂੰ ਦੱਸ ਦਿੱਤਾ,
ਜਿਵੇਂ ਪਹਿਲਾਂ ਹੀ ਓਹ ਜਾਣੂ ਸੀ
ਹਲਕਾ ਜਿਹਾ ਓਹਨੇ ਹੱਸ ਦਿੱਤਾ,
ਛੇੜ ਕੰਡਿਆਂ ਨੂੰ ਓਹਨੇ ਗੱਲ ਪੁੱਛੀ
ਦੱਸ ਮੁੱਲ ਕੀ ਦੁੱਖਾਂ ਬਿਨ ਸੁੱਖ ਦਾ,
ਕੋਈ ਚਿੜ੍ਹੀ ਵੀ ਚੋਗਾ ਨਾ ਚੁਗਦੀ
ਜੇ ਦਰਦ ਹੁੰਦਾ ਨਾ ਭੁੱਖ ਦਾ,
ਹਰ ਨਦੀ ਬਣੀ ਫੇਰ ਅਣਮੁੱਲੀ
ਜਦੋਂ ਰੱਜ ਕੇ ਮੈਂ ਤਿਰਹਾਇਆ ਸੀ,
ਇੱਕ ਭੇਤ ਸੀ ਓਸ ਨੇ ਹੋਰ ਦੱਸਿਆ
ਮੈਨੂੰ ਮਗਰੋਂ ਸਮਝ ਵਿੱਚ ਆਇਆ ਸੀ,
ਇਹ ਦੇਵ ਵੀ ਬੰਦੇ ਤੋ ਸੜ੍ਹਦੇ ਨੇ
ਜਿਨ, ਨਾ ਸਾਹ ਜਾਂਦੇ ਨਾ ਸੁੱਖ ਜਾਂਦਾ,
ਅਸੀਂ ਵਕਤ ਆਏ ਤੇ ਮੁੱਕਣਾ ਏ
ਇਹ ਵਕਤ ਓਹਨਾ ਲਈ ਰੁੱਕ ਜਾਂਦਾ |

Side-Effects

ਮੈ ਸਾਹਿਜ਼ਾਦਾ ! ਕਿਸੇ ਸੁੰਨੇ ਜੰਗਲ 'ਚ ਤੁਰਿਆ ਜਾ ਰਿਹਾ ਸੀ,
ਅਚਾਨਕ ਹੀ ਰਿਓਹ ਦੀ ਝੋਲੀ ਮੁੱਕਣ ਦਾ ਅਹਿਸਾਸ ਹੋਇਆ

ਜਦੋਂ ਓਸ ਜੰਗਲ 'ਚੋਣ ਬਾਹਰ ਆਇਆ
ਤਾਂ ਮੇਰੇ ਕੰਨੀ ਇੱਕ ਤਿੱਖੀ ਕੂਕ ਪਈ,
ਮੇਰੀ ਮਾਂ ਉੱਤੇ ਨਸ਼ੇ ਦਾ ਅਸਰ ਸ਼ੁਰੂ ਹੋ ਗਿਆ ਸੀ

ਬੇ-ਮੁੱਖ ਹੋ ਕੇ ਪਰਤ ਰਹੇ ਦਾ ਮੇਰਾ ਦਿਲ ਜ਼ੋਰ ਨਾਲ ਹਿੱਲਿਆ,
ਡੇਕ ਤੇ ਪਿਆ ਚਿੜ੍ਹੀ ਦਾ ਆਲ੍ਹਣਾਂ ਅੱਜ ਫੇਰ ਸੁੰਨਾ ਸੀ

ਇਹ ਸਾਂਝ ਵੀ ਕਿਸੇ ਡੂੰਘੇ ਰਿਸ਼ਤੇ ਦੀ ਪ੍ਰਤੀਕ ਹੈ,
ਕੁੜੀਆਂ ਤੇ ਚਿੜ੍ਹੀਆਂ ਦੀ ਸਮੱਸਿਆ ਵੀ ਇੱਕੋ ਹੀ ਸੀ

ਕਈ ਬੇ-ਜ਼ੁਬਾਨਿਆ ਨੂੰ ਕੁੱਝ 'ਨੀ ਪਤਾ ਓਹ ਰੋਜ਼ ਕੀ ਖਾਂਦੇ ਹਨ,
ਮੈਨੂੰ ਅੱਜ ਰੋਟੀ ਤੇ ਪਈ ਮਖਣੀ ਵੀ ਯੂਰੀਏ ਦੀ ਮੁੱਠ ਜਾਪੀ

ਵਧਾਈਆ ਦੀ ਸਾਰੀ ਗਲੀ 'ਚ ਗੂੰਜ ਫੈਲ ਗਈ,
ਇੱਕ ਦਾਈ ਦਾਦੀ ਬਣੀ ਸੀ ਵੱਡੇ ਅਪ੍ਰੇਸ਼ਨ ਦੀ ਮਦਦ ਨਾਲ.......

ਮੈਂ ਕੀ ਜਾਣਾ

ਮੈਂ ਕੀ ਜਾਣਾ ਇਹ ਇਸ਼ਕ ਸਮੁੰਦਰ ਕਿੰਨੇ ਡੂੰਘੇ ਨੇ
ਮੈਂ ਕੀ ਜਾਣਾ ਇਹ ਸੁਲਾਹ ਸਫ਼ਾਈਆ ਕੀ ਰੋਸੇ ਹੁੰਦੇ ਨੇ,

ਕਦੇ ਦਿੱਤਾ 'ਨੀ ਕੋਈ ਤੋਹਫ਼ਾ ਕਿਸੇ ਕੁਆਰੀ ਨੂੰ
ਮੈਂ ਕੀ ਜਾਣਾ ਇਹ ਕੀ ਝਾਂਜਰਾਂ ਕੀ ਬੁੰਦੇ ਹੁੰਦੇ ਨੇ,

ਦੁਨੀਆ ਹਰ ਗਈ ਮੇਰੇ ਤੇ ਕਬਜ਼ਾ ਨਈ ਹੋਇਆ
ਮੈਂ ਕੀ ਜਾਣਾ ਇਹ ਕੀ ਸਕੰਦਰ ਦੇ ਸ਼ਕੰਜੇ ਹੁੰਦੇ ਨੇ,

ਸਾਤੋਂ ਇਹਨਾਂ ਅੱਲੜ੍ਹਾ ਦੀ ਖ਼ਿਦਮਤ ਨਈ ਹੋਈ
ਮੈਂ ਕੀ ਜਾਣਾ ਇਹ ਕੀ ਗੁਲਾਮੀ ਦੇ ਫੰਦੇ ਹੁੰਦੇ ਨੇ,

ਰੱਬ ਜਾਣੇ ਲੋਕੀ ਐਨੀਆ ਕਿਵੇਂ ਨਿਭਾ ਜਾਂਦੇ
ਮੈਂ ਕੀ ਜਾਣਾ ਇਹ ਗੁਨਾਹ ਚੰਗੇ ਜਾਂ ਮੰਦੇ ਹੁੰਦੇ ਨੇ,

ਜਿਹੜੀ ਲਊ ਲਾਵਾਂ ਓਹਨੂੰ ਜੱਟੀਓ ਹੀਰ ਬਣਾਦਾਗੇ
ਮੈਂ ਕੀ ਜਾਣਾ ਇਹ ਪਿਆਰ ਜੂਆ ਜਾਂ ਧੰਦੇ ਹੁੰਦੇ ਨੇ

ਮੇਰੇ ਪਿਆਰ ਦੀ ਅਜਬ ਕਹਾਣੀ......

ਚਮਕੀਲੀ ਜਈ, ਸ਼ਰਮੀਲੀ ਜਈ

ਜਿਵੇਂ ਜਾਤਾਂ ਵਿੱਚ ਕਬੀਲੀ ਜਈ,

ਥੋੜੀ ਉਲਝੀ ਜਈ, ਥੋੜੀ ਸੁਲਝੀ ਜਈ

ਜਿਵੇਂ ਪੱਕੀ ਡੋਰ ਦੀ ਗੁਲਝੀ ਜਈ,

ਇੱਕ ਹਉਂਕਾ ਜਈ, ਇੱਕ ਮੌਕਾ ਜਈ

ਕਿਸੇ ਗਰੀਬ ਲਈ ਉਹ ਪਟ-ਰਾਣੀ ਜਈ

ਮੇਰੇ ਪਿਆਰ ਦੀ ਅਜਬ ਕਹਾਣੀ ਜਈ,



ਉਹ ਆਉਂਦੀ ਸੀ, ਚਮਲਾਉਂਦੀ ਸੀ

ਨਾਲੇ ਬਾਤਾਂ ਬਹੁਤ ਸੁਣਾਉਂਦੀ ਸੀ,

ਫੜਾਅ ਕੰਨੀ ਗਜ਼ਲਾਂ ਗੀਤਾਂ ਦੀ

ਮੈਨੂੰ ਸੋਚਾਂ ਵਿੱਚ ਉਲਝਾਉਂਦੀ ਸੀ,

ਕੁਝ ਨਗਮੇ ਮੇਰੇ ਨਾਲ ਗਾਏ

ਜਿਵੇਂ ਧੀ ਆਖੇ ਸੁਣ ਹਾਲ ਮਾਏਂ

ਤੇਰੇ ਜਵਾਈ ਨਾ ਕਦਰ ਪਛਾਣੀ ਜਈ

ਮੇਰੇ ਪਿਆਰ ਦੀ ਅਜਬ ਕਹਾਣੀ ਜਈ,


ਇੱਕ ਪਲ ਵਰਗੀ, ਇੱਕ ਗੱਲ ਵਰਗੀ

ਉਹ ਸੱਜਣ ਠੱਗ ਦੇ ਛੱਲ ਵਰਗੀ,

ਜੁਲਫਾਂ ਨੂੰ ਜਾਲ ਬਣਾਉਦੀ ਸੀ

ਚੰਡੀ ਹੋਈ ਕਿਸੇ ਮੱਲ ਵਰਗੀ,

ਦਾਅ ਮੇਰੇ ਤੇ ਵੀ ਲਾਏ ਸੀ

ਜਿਵੇਂ ਮਾਂ ਨੇ ਲਾਲ ਗਵਾਏ ਸੀ

ਕਰ ਗਲਤੀ ਓਹੀ ਪੁਰਾਣੀ ਜਈ

ਮੇਰੇ ਪਿਆਰ ਦੀ ਅਜਬ ਕਹਾਣੀ ਜਈ,



ਨਾ ਨਾਵਾਂ ਸੀ, ਪਰਛਾਵਾਂ ਸੀ

ਮੇਰੇ ਦਿਲ ਵਿਚ ਓਹਨੂੰ ਦੁਆਵਾਂ ਸੀ,

ਉਹ ਕਦੇ-ਕਦੇ ਆ ਨਾਲ ਬਹਿੰਦੀ

ਕਦੇ ਲੱਗਦਾ ਜਿਵੇਂ ਛਲਾਵਾ ਸੀ,

ਖੌਰੇ ਕਿਸ ਰੂਹ ਦੀ ਜਾਈ ਸੀ

ਇੱਕ ਬਾਬੇ ਗੱਲ ਸੁਣਾਈ ਸੀ

ਆਵੇ ਸਮਝ ਨਾ ਧੀ-ਧਿਆਣੀ ਜਈ

ਮੇਰੇ ਪਿਆਰ ਦੀ ਅਜਬ ਕਹਾਣੀ ਜਈ,


ਇੱਕ ਸੁਪਨਾ ਸੀ, ਇੱਕ ਉਪਮਾਅ ਸੀ

ਕੀਤਾ ਗੁਨਾਹ ਕੋਈ ਜਿਵੇਂ ਲੁਕਮਾ ਸੀ,

ਆ ਖੁਆਬਾਂ ਵਿੱਚ ਜਤਾਉਂਦੀ ਸੀ

ਕਿਸੇ ਰਾਜੇ ਦਾ ਜਿਵੇਂ ਹੁਕਮਾ ਸੀ,

ਉਹ ਸੁਪਨੇ ਅੱਜ ਵੀ ਚਾਹੁੰਦਾ ਹਾਂ

ਓਹ ਨਗਮੇ ਅੱਜ ਵੀ ਗਾਉਂਦਾ ਹਾਂ

ਏਸੇ ਯਾਦ 'ਚ ਕਲਮ ਚਲਾਈ

ਜਿਵੇਂ ਜੱਟ ਕਰਦਾ ਹਲ੍ਹ-ਵਾਈ

ਲਾਏ ਫ਼ਸਲ ਨੂੰ ਪਹਿਲੇ ਪਾਣੀ ਜਈ

ਮੇਰੇ ਪਿਆਰ ਦੀ ਅਜਬ ਕਹਾਣੀ ਜਈ |

ਦਿਲ ਕਠੋਰ 'ਨੀ ਹੋਇਆ

ਹੁਣ ਤਾਂ ਦਿਲ ਭਰਿਆ-ਭਰਿਆ ਜਿਹਾ ਰਹਿੰਦਾ,
ਕਿਸੇ ਗੱਲੋਂ ਠਰਿਆ-ਠਰਿਆ ਜਿਹਾ ਰਹਿੰਦਾ,
ਪਤਾ ਨੀ ਏਹਦੇ ਦਿਨ ਪੂਰੇ ਹੋ ਚੱਲੇ
ਪਤਾ ਨੀ ਇਹ ਕਿਸੇ ਦੇ ਵਸ ਪੈ ਗਿਆ
ਬੱਸ ਐਵੇ ਮਰਿਆ-ਮਰਿਆ ਜਿਹਾ ਰਹਿੰਦਾ,
'ਸਰਤਾਜ' ਤਾਂ ਕਹਿੰਦਾ ਸੀ 'ਦਿਲ ਕਠੋਰ ਹੋ ਗਿਆ'
ਪਰ ਇਹ ਤਾਂ ਸਾਲਾ ਡਰਿਆ-ਡਰਿਆ ਜਿਹਾ ਰਹਿੰਦਾ |